Khuasak

Rate this item
(1 Vote)

Thuantak khua le Vomhzang khua pan Lophei, Limkhai, Thuklai ci te inntuan in khua a saat tak ciang Khuasakte in inn lua a, Thuantak le Vomhzang ah teang suak lai hi. 1729-30 hun pawlin Pu That Lang le a tate lampuina taw tulaitak Khuasak khua ii Khualui hawng ah khua khiinto hi. Tua khua sia khua saat thak in kingaisun ngawl a, Vomhzang khua a tuato bangin ngaisun ahikom khua min zongh Vomhzang khua min dang khat ahi “Khuasak” sia kipua sak paih hi. Tuabek dom ngawl Tualbawl ciang Vomhzang khua ah tual phuisam bangin kisam hi. Khuasak khua khiinto te min kihel sak ngawl hi. Khuasak te sia Thuantak, Vomhzang pan a tai khak bel Sizangte innlua ahi hi.

Sizang ngeina teng lua suk a, hun khat ciang Khuasam Poai teng zongh Sizang bup atu Khuasak pan veu in kivawt hi.Khuasak sia Sizangte ii Khuapi khat a hina le ngaal lampui Pu Khai Kam ii khua a hina taw Mikaang ngamkeau te ii a laak nop bel khua khat sungah kihel hi. Mikaangte in 4 Feb. 1889 ni in Khuasak khua simtham a, 1 July 1890 ciang Khuasak khua ma ah Sizangte le Mikaang kumpi kilemna kivawt hi.

Khuasak khua ah 1957 kum in mawtaw theng hi. 1950 in Khuasak le Thaang telephone khau kithung a, telephone taw kipaupui thei hi. 1950 kum sung ma in Thuklai taw telephone khau kithung a, telephone khau thun na sa Voklaak dongin kipaupui thei hi. 1899 kum ciang American Baptist Mission Kawllai tan li saang kihong hi. 1920 kum ciang tua Mission saang tan sali dong kikhanto hi. 1925 kum ciang Mission tan sali saang kiphiat a, Kumpi te ii State Primary School kihong hi. 1945 kum ciang Sizang sung upa te vaihawmna taw Private Middle School (Manglai tan sali sang) kiphuan hi. Tua sang sia 1945 kum ciang Thuklai ah kitua ahikom 1925 kum in a kihong State Primary School sia om suak lai hi. 2002 kum ciang tua saang sia kumpi te in (မူလြန္ – mu-lun) sang suak to sak hi. SDA pan ADRA te palai sepna taw Japan huuna Hydro Power vawt thei tu kinga a, 1999 kum ciang Luipi ah kivawt in Thuklai khua taw kop in Tuimei (Hydro Power) kizangh thei hi. 2004 kum ciang SIDA pan huuna kinga a, SRBA zum te ii zeak tu le Khuasak khua ii neak tu Zonaak tui kila thei hi.

Biakna taw kisai a kipat pan kipan Lawki ngeina kibia hi. 1904 kum ciang Pu Pau Suan te nupa le Pu Thuam Hang te nupa kop tungtawn in Tuiphum Tapidaw biakna kipan hi. 1912 kum ciang Laipian biakna hong theng a, pawlkhat in zui phot ahizong bo kik hi. 1951 kum ciang RC hong theng a, hun khat ciang bo kik hi. 1956 kum ciang SDA hong theng a, 1958 kum ciang Siyin Valley Seventh Day Adventist Church, Khuasak khua ah phut hi. 1987 kum ciang AG pawlpi om thua hi. 2004 kum in Chin Christian Centenary Poaipi Khuasak ah kivawt a, tua hunin khua sungah Lawki om nawn ngawl hi.

Source: Khuasak Khua facebook

Last modified on Friday, 29 April 2016 02:54
More in this category: « Thuklai Lophei »
Login to post comments